Ankesa e banorëve në Saranda Web: Magazina e mbeturinave të elektrikut rrezik
Një shqetësim serioz është ngritur nga banorët e një pallati pranë sheshit përballë Pica Savos, ku prej kohësh, sipas tyre, një zonë publike është kthyer në një vend grumbullimi hekurishtesh, kabllosh të prishura dhe transformatorësh të hedhur nga ndërmarrja elektrike.
“Sheshi është shndërruar në një pikë të rrezikshme, ku çdo ditë shtohen jo vetëm mbeturinat dhe pajisjet elektrike të braktisura, por dhe automjete që kanë mbi disa vite të lëna aty pa lëvizur. Situata është e papranueshme, sidomos duke qenë se ndodhemi pothuajse në qendër të qytetit,” – shkruajnë banorët për Saranda Web.
Përveç ndotjes vizuale dhe ambientale, banorët raportojnë për përhapjen e insekteve, kafshëve endacake dhe ndjesinë e vazhdueshme të rrezikut shëndetësor, sidomos për fëmijët dhe të moshuarit që kalojnë çdo ditë pranë kësaj zone.
“Në dimër notojmë në baltë, ndërsa në verë mbytemi nga pluhuri. Kërkojmë nga Bashkia e Sarandës që të ndërhyjë sa më shpejt për sistemimin dhe shtrimin e këtij sheshi, dhe të kërkojë nga ndërmarrja elektrike heqjen e menjëhershme të pajisjeve të hedhura aty.”
Banorët shtojnë se ndihen të harruar nga institucionet dhe kërkojnë të jetojnë në një qytet të pastër, të sistemuar, ku edhe hapsirat publike të trajtohen me respekt dhe përkujdesje.
Saranda Web i bashkohet këtij apeli qytetar dhe fton institucionet përgjegjëse të reagojnë menjëherë për t’i dhënë zgjidhje një problematike që po ndikon drejtpërdrejt në cilësinë e jetës në qytet.
📸 Në vijim, shihen edhe fotot e situatës së denoncuar.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
