61-vjeçari përfundon në pranga dhe me 5 akuza mbi kurriz – VIDEO

Një operacion i organizuar nga Seksioni për Hetimin e Krimeve Ekonomike dhe Financiare në Drejtorinë Vendore të Policisë Vlorë ka çuar në goditjen e një rasti të tregtimit të mallrave të kontrabanduara në qytetin e Sarandës.

Gjatë operacionit, u arrestua në flagrancë shtetasi B. Ç., 61 vjeç, banues në Finiq, i cili akuzohet për veprat penale “Tregtimi i mallrave kontrabandë”, “Ruajtja e mallrave kontrabandë”, “Punësimi i paligjshëm”, “Fshehja e të ardhurave” dhe “Ushtrimi i aktivitetit tregtar të paregjistruar në organet tatimore”.

Ky shtetas u kap në lagjen nr. 2 të Sarandës, duke shitur celularë dhe aksesorë të ndryshëm, të dyshuar si mallra të kontrabanduara.

Gjatë kontrollit, Policia sekuestroi në cilësinë e provës materiale:

• 134 aparatë celularë,
• mbi 350 aksesorë celularësh,
• dhe ora dore të markave të ndryshme.

Mallrat, të cilat kanë një vlerë të përafërt prej 20,000 eurosh, u bllokuan nga autoritetet, ndërsa materialet procedurale u referuan në Prokurorinë pranë Gjykatës së Shkallës së Parë Sarandë për veprime të mëtejshme.