Vendimi për njohjen e pakicave të reja kombëtare dhe përdorimi i gjuhëve në institucione

Qeveria miraton tre vendime për pakicat kombëtare në Shqipëri

Këshilli i Ministrave ka miratuar tre vendime për të drejtat dhe identitetin e pakicave kombëtare në Shqipëri. Vendimet, të miratuara më 26 dhjetor 2024, përfshijnë procedurat e vetidentifikimit, njohjen e pakicave të reja dhe përdorimin e gjuhës së pakicave në marrëdhëniet me pushtetin vendor.

 

 

1. E drejta për vetidentifikim të lirë

 

Vendimi nr. 843 përcakton kriteret dhe procedurat për mbledhjen e të dhënave mbi përkatësinë etnike të qytetarëve shqiptarë. Ai garanton të drejtën e vetidentifikimit të lirë për çdo individ që pretendon se i përket një pakice kombëtare. Procesi do të administrohet nga një komision pranë Ministrisë së Brendshme, i cili përfshin edhe përfaqësues të pakicave.

 

Personat që kërkojnë të vetidentifikohen duhet të paraqesin një formular të posaçëm pranë komisionit, i cili do të shqyrtohet brenda 30 ditëve. Në raste të veçanta, kur ka dyshime për deklarimet e bëra, mund të kërkohet verifikim i mëtejshëm nga Gjendja Civile dhe institucione të tjera relevante. Nëse verifikimi nuk është i mundur, vetidentifikimi i individit do të konsiderohet i vlefshëm bazuar në zgjedhjen e tij personale.

 

Ky vendim synon respektimin e diversitetit etnik në vend dhe garanton të drejtën e pakicave për të deklaruar identitetin e tyre pa kufizime apo pengesa burokratike.

 

2. Përdorimi i gjuhës së pakicave në institucionet vendore

 

Vendimi nr. 844 vendos rregulla për përdorimin e gjuhëve të pakicave në njësitë e vetëqeverisjes vendore ku ato përbëjnë të paktën 20% të popullsisë.

 

Në këto raste, pakicat kanë të drejtë të komunikojnë me institucionet në gjuhën e tyre, të kërkojnë dokumente zyrtare dhe të propozojnë emërtime dygjuhëshe për rrugët dhe institucionet publike. Përveç kësaj, aktet administrative dhe informacionet publike duhet të jenë të disponueshme edhe në gjuhën e pakicës. Këshillat bashkiakë janë të detyruar të shqyrtojnë kërkesat për përdorimin e gjuhës së pakicës dhe, nëse ato pranohen, të marrin masa për zbatimin e tyre.

 

Njësitë e vetëqeverisjes vendore duhet të sigurojnë fonde për punësimin e përkthyesve dhe hartimin e dokumenteve në gjuhën e pakicës, duke përfshirë përkthimin e tabelave rrugore dhe shenjave të tjera publike. Në rastet kur një bashki refuzon të zbatojë këtë vendim, qytetarët kanë të drejtë të ankimojnë vendimin në gjykatë.

 

3. Njohja e pakicave të reja

 

Vendimi nr. 845 përcakton rregullat dhe procedurat për njohjen e pakicave të reja në Shqipëri. Grupet që kërkojnë njohje zyrtare si pakicë kombëtare duhet të përbëjnë të paktën 1% të popullsisë me shtetësi shqiptare dhe të depozitojnë një kërkesë pranë Komisionit për Njohjen e Pakicave Kombëtare.

 

Komisioni përbëhet nga përfaqësues të institucioneve shtetërore dhe organizatave të shoqërisë civile, të cilët shqyrtojnë dokumentacionin dhe vlerësojnë përmbushjen e kritereve për njohjen e një pakice. Procesi i shqyrtimit zgjat deri në nëntë muaj dhe përfshin konsultime me ekspertë të historisë, kulturës dhe të drejtave të njeriut. Nëse kërkesa pranohet, ajo i paraqitet Këshillit të Ministrave për miratim.

 

Ky vendim synon të rregullojë procesin e njohjes së pakicave të reja duke siguruar që çdo grup që plotëson kriteret të ketë mundësinë e njohjes ligjore dhe mbrojtjes së të drejtave të tij.

 

Përfaqësuesit e minoritetit grek: Një hap përpara në mbrojtjen e të drejtave të pakicave

 

Këto vendime nga përfaqësuesit e minoritetit grek shihen si një hap i rëndësishëm drejt respektimit të të drejtave të pakicave kombëtare në Shqipëri. Ato synojnë të garantojnë barazi dhe përfshirje për të gjitha komunitetet etnike që jetojnë në vend. Me zbatimin e tyre, Shqipëria përforcon angazhimin e saj për respektimin e standardeve evropiane në fushën e të drejtave të njeriut dhe diversitetit kulturor, shprehen përfaqësuesit e minoritetit grek. 

 

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

---