Pas shqetësimit në Saranda Web, vjen reagimi

Pas shqetësimit të ngritur në Saranda Web dhe Report Tv për gjendjen në të cilën ndodhej Kisha e Shën Mërisë në Manastirin e Krorëzës ku rrënjët e pemëve të mbira përgjatë viteve kanë depërtuar në muret e kishës, ka ardhur edhe reagimi nga Drejtoria Rajonale e Trashëgimisë Kulturore në Vlorë.
Drejtoria Rajonale e Trashëgimisë Kulturore në Vlorë, kreu ndërhyrje mirëmbajtëse dhe pastrime nga vegjetacioni pranë këtij monumenti.
Sipas drejtuesve të DRTK Vlorë, ky aksion për ruajtjen dhe mirëmbajtjen e monumenteve të kulturës do të vazhdojë, për t’i kthyer këto vende në atraksione të denja turistike.
Kisha e Manastirit të Shën Mërisë, Krorëz është ndërtuar në një breg shkëmbor, në një pozitë natyrore të mbrojtur dhe njëkohësisht piktoreske, prej nga shtrihet një pamje e gjerë e peizazhit bregdetar.
Nga ndërtimet e vjetra të manastirit kanë arritur deri në ditët e sotme kisha, kulla dhe një ndërtesë me çardak. Kisha është e tipit në formë kryqi me kupolë, me përmasa të brendshme 7.90×4.40 m. Ambienti i altarit ndahet nga një ikonostas prej muri guri, me tri hapësira hyrjeje.