Pas publikimit në Saranda Web, hidhet betoni dhe eliminohet rreziku për banorët në Delvinë. Vetëm një ditë pas publikimit në Saranda Web të shqetësimit të banorëve për punimet e lëna përgjysmë në një lagje të Delvinës, situata ka ndryshuar.
Paraditen e sotme është ndërhyrë në segmentin problematik dhe është hedhur shtresa e betonit, duke eliminuar rrezikun që prej rreth 20 ditësh shqetësonte banorët e zonës.
Denoncimi i publikuar dje evidentonte se në hyrje të pallatit ishte lënë e ekspozuar rrjeta metalike e betonit, duke krijuar vështirësi në lëvizje dhe rrezik për fëmijët, gratë, të moshuarit dhe banorët që kalonin çdo ditë në atë segment.
Pas publikimit, institucionet kanë reaguar duke përfunduar punimet. Fotot e dërguara sot nga banorët tregojnë se segmenti tashmë është shtruar me beton dhe zona është siguruar.
