Numri i pacientëve të shëruar dyfish më i lartë se i të infektuarve, vetëm 7 raste të reja në 24 orë

Për herë të parë, numri i pacientëve të shëruar është dyfish më i lartë se i qytetarëve të prekur me COVID-19 gjatë 24 orëve të fundit. Ministria e Shëndetësisë, në buletinin ditor, ka bërë me dije se 7 raste të reja janë konfirmuar sot nga 225 teste, e ndërsa janë shëruar 15. Rastet e reja janë regjistruar në Krujë, më konkretisht 3 persona, 1 punonjës në fasoneri dhe 2 të tjerët raste kontakti, ndërkohë 2 raste të tjera në Tiranë dhe 2 në Shkodër.

Numri i ulët i rasteve të reja gjatë 24 orëve të fundit, por edhe numri i ulët i të shtruarve në spitale, sipas Ministrisë së Shëndetësisë janë treguar se situata është në kontroll. Mësohet se në dy spitale COVID në Tiranë, në total janë 36 pacientë. Në shërbimin infektiv aktualisht janë 31 të shtruar, 6 prej të cilëve janë në terapi intensive dhe spitalin COVID 2 “Shefqet Ndroqi”, janë 5 pacientë të shtruar. 1 pacientë është në terapi intensive në gjendje më të rënduar.

Nga rezultatet e testimeve në 24 orët e fundit janë konfirmuar 7 raste pozitive me COVID19, nga të cilat 3 raste janë në Krujë, 2 raste në Tiranë dhe 2 raste në Shkodër.
Gjatë 24 orëve të fundit janë testuar 225 persona të dyshuar me COVID-19.
Deri në këto momente janë testuar 8253 raste të dyshuara dhe prej tyre janë të konfirmuar pozitivë me COVID-19, 773 raste.