NDALOHET DALJA NË DET NË SARANDË, KSAMIL DHE BORSH
Për shkak të përkeqësimit të kushteve atmosferike dhe detare, Kapiteneria e Portit ka marrë vendim për ndalimin e dhënies së lejeve dhe çdo dalje në det të mjeteve lundruese në zonën jugore të vendit.
Sipas njoftimit zyrtar, erërat me intensitet të lartë dhe dallgëzimi përtej normave të lejuara për lundrim të sigurt paraqesin rrezik serioz për aktivitetet detare.
Ndalimi përfshin të gjitha mjetet lundruese, përfshirë mjetet turistike, peshkarexhat dhe skafet e vogla, dhe zbatohet në të gjithë gjirin dhe zonën bregdetare të Sarandës, Ksamilit dhe Borshit.
Ky vendim hyn në fuqi më datë 04.02.2026, në orën 01:00, dhe do të qëndrojë aktiv deri më 05.02.2026, në orën 04:00.
Ndërkohë, bëhet e ditur se trageti i linjës Sarandë–Korfuz do të vijojë lëvizjen normalisht deri në një njoftim të dytë.
Autoritetet u bëjnë thirrje operatorëve detarë dhe qytetarëve të respektojnë ndalimin, me qëllim garantimin e sigurisë në det dhe shmangien e çdo incidenti.
