Minella Qurku, “Dekani i Shahut” në Sarandë – 4 Vjet nga ndarja e Tij nga jeta

Minella Qurku, “Dekani i Shahut” në Sarandë – 4 Vjet nga ndarja e Tij nga jeta

Sot mbushen katër vjet nga ndarja nga jeta e Minella Qurkut, një figure emblematike për sportin e shahut në Sarandë. I njohur si “Dekani i Shahut”, ai la pas një trashëgimi të vyer për shahistët e të gjitha moshave dhe mbetet një simbol i pasionit për lojën e mendjes.

Minella Qurku nuk ishte vetëm kryetar i Shoqatës së Shahut në Sarandë, por edhe një veteran dhe promovues i palodhur i këtij sporti. Sipas tij, tradita e shahut në Sarandë lidhet me periudhën para viteve ’50, kur shahistët vendas luanin me kuti të ndërtuara vetë. Kjo lojë e zgjuarsisë zhvillohej në lulishte, në stola e madje edhe në kushte atmosferike të pafavorshme, me lojtarët që vazhdonin ndeshjet e tyre në shi, të mbrojtur vetëm nga çadrat dhe të rrethuar nga dhjetra tifozë.

Me kalimin e viteve, shahistët filluan të organizoheshin më mirë. Deri në vitin 1995, Saranda nuk kishte një hapësirë të dedikuar për këtë sport, ndonëse interesi rritej. Pikërish atëherë, Minella Qurku vendosi të hapte një sallë të veçantë për shahun në një pjesë të lokalit të tij në lagjen nr. 2 të Sarandës. Me financat e tij, ai ngriti një ambient që shpejt u bë një vatër e pasionit për shahun, ku breza të ndryshëm kaluan orë të tëra mes strategjish dhe sfidash intelektuale.

Gjatë trazirave të vitit 1997, kur qyteti ishte në kaos, “Dekani” inicoi një kampionat shahu në shenjë paqeje, duke e kthyer atë në aktivitetin e parë sportiv pas kolapsit të institucioneve. Ai vazhdoi të organizonte turne dhe kampionate lokale e kombëtare, duke i dhënë shahut një peshë të veçantë në jetën sportive të Sarandës.

Në vitin 2001, në sallën e tij u zhvillua një kampionat kombëtar shahu, ku morën pjesë 12 mjeshtër sporti nga e gjithë Shqipëria. Ky aktivitet ishte një kulm i përpjekjeve të tij dhe i tregon angazhimin e palëkundur për zhvillimin e shahut në qytet. Ai punoi me mjeshtrin e njohur Lime Mihasi dhe me shahistë të shquar si Murat Mejdi dhe Ilir Hosha, duke ndihmuar në rritjen e nivelit të shahut në Sarandë.

Përpos sukseseve lokale, ekipi i shahut “Butrinti” arriti një tjetër majë të lavdishme kur në vitin 2003 zuri vendin e tretë në Kampionatin Kombëtar të Shahut në Tiranë dhe pak muaj më vonë mori pjesë në një ndeshje miqësore në Prishtinë kundër shahistëve kosovarë.

Megjithë sfidat, Minella Qurku nuk u dorëzua kurrë. Ai vazhdoi të promovonte shahun, veçanërisht tek të rinjtë e shkollave të mesme dhe 9-vjeçare të Sarandës. Edhe pse shpesh ndjente mungesën e mbështetjes financiare nga autoritetet lokale, ai besonte se ky sport do të vazhdonte të lulëzonte dhe të trashëgohej brez pas brezi.

Sot, pas katër vitesh nga ndarja e tij nga jeta, figura e Minella Qurkut vazhdon të kujtohet me respekt dhe mirënjohje nga komuniteti shahist dhe sportdashësit e Sarandës. Ai nuk ishte vetëm “Dekani i Shahut”, por edhe një model i përkushtimit dhe pasionit për sportin e mendjes. Trashëgimia e tij vazhdon të jetojë në brezat që do të mbajnë gjallë pasionin për shahun në qytetin bregdetar.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb