Dogji Flamurin Kombëtar/ Shpallet në kërkim Manoli, dyshimet ku fshehet

Një ditë pas publikimit të videos në rrjetet sociale teksa digjte flamurin shqiptar, Report TV mëson se minoritari grek Manol Vito është marrë në hetim nga Anti Terrori.
Manol Vito është shpallur në kërkim dhe pavarësisht se ditën e djeshme ai ka përditësuar një status në facebook me vendndodhje në Korfuz, ka dyshime që Manol Vito është fshehur në zonën malore të Gravës.

“Më datë 16.06.2020 u referuan materiale në Prokurorinë pranë Gjykatës së Shkallës së parë Sarandë për shtetasin Manol Vito, me arsim 12 klase sepse në vendin e quajtur “Plazhi i ri” Sarandë më datë 15.06.2020 ka djegur flamurin shqiptar të cilin e kishte marrë në godinën e shoqatës “Omonia” Sarandë. Veprat Penale “Nxitje e urrejtjes ose grindjeve” dhe “Poshtërim i Republikës dhe simboleve të saj. Punohet për gjetjen dhe shoqërimin e tij dhe sqarimin e plotë të rrethanave të ngjarjeve”, shkruhet në dokumentin që Report Tv disponon.

Videoja u publikua ditën e djeshme në rrjetet sociale, ku Vito njërin prej flamujve e ka djegur pranë bulevardit “Hasan Tahsini” dhe tjetrin në parkun miqësia në qendër të Sarandës.
Videon e djegies së flamurit ai e shoqëronte me të tjera provokime të forta. “Këtë flamur e mora nga zyrat e OMONIA-s sepse nuk meriton që të qëndrojë atje dhe po e djeg. Këtu jemi në Sarandë, jemi në Vorio Epir dhe kam gjetur këtë leckë dhe shikoni sesi po digjet, ku janë patriotët dhe nacionalistët shqiptarë?” thotë ai.