KS Butrinti ka mundur 1-0 ekipin e Sopotit. Ka qenë sulmuesi Zylyftari ai që ka shënuar për Butrintin në minutën e 5-të të takimit. Në minutën e 17-të ka tension në fushë pasi futbollisti Kastrati i Sopotit ndëshkohet me kartonin e dytë të verdhë, ndërsa futbollistët nga Librazhdi kontestojnë ashpër vendimin e gjyqtarit Llapra. Tensioni zgjat për 5 minuta aq sa nga bankina e Sopotit vijnë udhëzime për të braktisur takimin. Gjatë momenteve të tensionit zyrtarë të ekipit mik hyjnë në fushë për të komunikuar me arbitrin Llapra. Ndeshja rifillon përsëri dhe është Butrinti që i afrohet golit të dytë me anë të futbollistit Kola i cili përballë portierit mik Lamellari gjuan në formë parable por një nga mbrojtësit e Sopotit e largon topin me kokë duke i mohuar golin. Në pjesën e dytë janë miqtë ata që kontrollojnë lojën por pa arritur që të shënojnë, ndërsa rrezikojnë edhe portën me anë të Llambit i cili gjuan fuqishëm nga distanca por topi ndalet në tranversë. Deri në fund të takimit rezultati nuk ndryshon dhe Butrinti merr 3 pikë me vlera duke u ngjitur në kuotën e 11 pikëve në tabelën e klasifikimit.
