81-vjetori i Genocidit ndaj shqiptarëve të Çamërisë, Homazh dhe Thirrje për Drejtësi – VIDEO

81-vjetori i Genocidit ndaj shqiptarëve të Çamërisë, Homazh dhe Thirrje për Drejtësi në Kllogjer

 

Në Varrezat Monumentale të Kllogjerit u përkujtua sot 81-vjetori i genocidit ndaj Çamëve nga Greqia, një ngjarje e rëndësishme për historinë e popullit shqiptar. Ky ceremoni përkujtimor u organizua nga Bashkia e Konispolit, dhe pati një pjesëmarrje të madhe të komunitetit çam dhe pasardhësve të viktimave, të cilët vendosën lule pranë monumentit të ndërtuar në nder të të parëve të tyre.

 

Pavarësisht Temperaturave të Larta, Kujtimi i Viktimave Nuk Ndalet

 

Pavarësisht temperaturave të nxehta që karakterizuan këtë ditë, qindra çamë, pasardhës të viktimave të genocidit, kanë shprehur respektin për ata që humbën jetën në mënyrë të pafalshme. Ata vendosën lule pranë monumentit, duke nderuar kujtimin e të parëve të tyre dhe duke mbajtur gjallë historinë e dhimbshme të Çamerisë.

Një ndër të ftuarit e nderuar ishte Fadil Nuriu, i cili, si fëmijë, ka pësuar humbjen e familjes në moshën 9-vjeçare. Fadil Nuriu, që sot është 90 vjeç, ka ardhur nga Amerika për të kujtuar genocidin ndaj familjes së tij dhe për të kërkuar drejtësi për çamët.

 

Fadil Nuriu, Dëshmia e Një Jete të Dhimbshme

 

 

Fadil Nuriu ka kujtuar me emocion ngjarjen e tmerrshme të ndodhur në vitin 1944, kur ushtarët grekë dogjën shtëpinë e tij dhe vranë të afërmit e tij. Ai, së bashku me vëllain, mbeti jetim dhe i lënë pas, duke përjetuar tragjedinë e të tjerëve në një mënyrë të paimagjinueshme.

 

Sinkroni: Fadil Nuriu
“Jam 90 vjeç pa gënjeshtra. Kur ra zerva në Greqi, tha që gjithë shqiptarët të hapnin dyqanet dhe të punonin. Pastaj, tha: ‘Cilët janë burrat, i kapni dhe i therrni si këca.’ I kam parë sikur më qenë sot me ju. Nga shtëpia ime pak mendjen lartë, takojmë myftinë e Çamerisë. Pak më lart takoj Xhevitin, djalin e tij, e kapën nga flokët dhe e tërhoqi një ushtar grek. Ai tha, ‘Oh, nena ime,’ e mbaj mend si tani. E vranë, e therrën me thikë, e zhduken. Burrat që kapën i vranë me thikë dhe i zhduken. Këto janë të vërteta. Dy ditë më vonë morën gratë, i mbyllën dhe iu morën vathe e unaza. Nena ime kishte një vajzë në djep, u fut brenda të merrte rrobat e vajzës dhe në 5 minuta e dogjën, vetëm dhembët i mbetën. Pastaj erdhëm në Shqipëri, nena vdiq dhe ne mbetëm dy vëllezër jetim. Kam qenë 8-9 vjeç kur ndodhi kjo ngjarje.”

 

Hatixhe Rakipi: Një Ditë Kujtimi dhe Kërkese për Drejtësi

 

Për Hatixhe Rakipin, dita e sotme është një moment i veçantë, jo vetëm për të nderuar të parët e saj, por edhe për të kërkuar të drejtat e mohuara të çamëve. Ajo ka theksuar se kjo ngjarje është një mundësi për të bërë thirrje për drejtësi, një apel që duhet të dëgjohet në të gjitha nivelet.

 

Sinkroni: Hatixhe Rakipi
“Te kujtojmë të parët tanë, sepse në atë mur atje unë kam 12 veta, fëmijë xhaxhallarësh, nga ana e babait, gjyshërve tanë. Kemi ardhur për t’i respektuar, edhe për të kërkuar të drejtat tona të mohuara kudo dhe për të kërkuar të drejtat e atyre njerëzve që na prehen nëpër rrugët e botës, që u janë hedhur kockat në kanale të vendeve këtu dhe ne nuk dimë ku të shkojmë për t’i qarë dhe mblidhemi këtu për njerëzit tanë.”

 

Politikanët: Thirrje për Kujtim dhe Drejtësi

 

Në këtë përkujtim, iu bashkuan dhe përfaqësues të politikës. Ardit Bido, deputet i Partisë Socialiste, theksoi se duhet të kujtohen të gjitha viktimat e pafajshme, veçanërisht ato të Çamerisë.

 

Sinkroni: Ardit Bido
“Ne kemi për detyrë të kujtojmë të gjithë viktimat e pafajshme, veçanërisht ato të Çamerisë, sepse secili nga ne mund të kishte qenë në vendin e tyre në atë kohë dhe do të kishte pësuar të njëjtin fat. Duhet ta kremtojmë këtë pjesë të errët të historisë sonë përherë.”

 

Nga ana tjetër, Dashamir Tahiri ka kritikuar Shpëtim Idrizin për privatizimin e partisë çame dhe ka paralajmëruar zhvillime të reja për çështjen çame.

 

Sinkroni: Dashamir Tahiri
“Ju e dini si ka qenë më parë këtu, është një çështje e vështirë që do kohën e saj dhe do një zgjidhje diplomatike. Bisedimet e dy shteteve duhet të sjellin zgjidhjen e këtij ngërçi, por çamët janë riorganizuar me këtë që patët sot dhe do të rinovohen më mirë, nuk do ta lënë këtë çështje në duar të një njeriu, Shpëtim Idrizi, i cili ka zaptuar si shoqatën, ashtu edhe partinë dhe i ka kaluar në një pronë private. Kjo është partia e çamëve dhe askujt tjetër, ata kanë të drejtë ta rinovojnë dhe ta rikthejnë.”

 

Monumenti i Viktimave në Xarrë, Një Kujtim i Gjallë

 

Në Xarrë, ndodhet monumenti i viktimave nga genocidi grek, ku çdo vit qindra çamë mblidhen për të kujtuar të parët e tyre. Ky është një moment i rëndësishëm për ata që vazhdojnë të kërkojnë drejtësi dhe për ata që besojnë se kujtimi dhe drejtësia janë të lidhura ngushtësisht.

 

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb

---