Zbulohet arsenal lufte gjatë punimeve në rrugën Blerimas–Delvinë, ndërpriten menjëherë punimet
Tre predha artilerie janë zbuluar në zonën e njohur si “Mulliri i Bardhë”, gjatë punimeve për zgjerimin e rrugës Blerimas–Delvinë. Zbulimi u bë mëngjesin e së premtes, më 4 prill 2025, rreth orës 10:20, nga Maliq Llucaj, një nga punëtorët e firmës ndërtuese “Cobial”, i cili po kryente punime për rikonstruksionin e segmentit rrugor.
Pas raportimit të menjëhershëm në Sallën Operative të Policisë Vlorë, në vendngjarje mbërriti Shefi i Postës së Policisë në Delvinë, i cili konfirmoi praninë e tre predhave të vjetra artilerie, të cilat mendohet të jenë të mbetura nga ndonjë konflikt i mëhershëm.
Për të garantuar sigurinë publike, zona u rrethua dhe u mor nën mbikëqyrje nga forcat e rendit, ndërsa firma ndërtuese ndërpreu menjëherë çdo aktivitet në kantier. Prefekti i qarkut Vlorë ka kërkuar ndërhyrjen e menjëhershme të forcave xheniere për të kryer një verifikim të plotë dhe për të asgjësuar në mënyrë të sigurt municionin e rrezikshëm.
Deri në ndërhyrjen e specializuar të njësive për çminim, zona do të qëndrojë e izoluar për të shmangur çdo rrezik për banorët apo punonjësit. Autoritetet u bëjnë thirrje qytetarëve të shmangin lëvizjet pranë vendit të ngjarjes dhe të respektojnë perimetrin e sigurisë të vendosur nga policia.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
