Banorët në panik: Po na rrëshket toka nën këmbë

Terreni shtufor në kodrën e lagjes “Punëtori” në Gjirokastër, po bëhet gjithmonë e më rrëshqitshëm. Të 15 familjet që bujtin në këtë pallat gjashtë katësh, kanë gati 2 vjet që po kërkojnë ndërhyrje nga ana e Bashkisë Gjirokastër për të rigjeneruar masivin shtufor mbajtës që është edhe boshti themelor i të gjithë objekteve në kodër.

Ata apelojnë për ndërhyrje emergjente e cila në fakt ka munguar prej janarit të 2018 kohë kur u konstatua rrëshkitja e parë e terrenit përbri kodrës.

Ka qenë data 5 janar 2018 kur tronditja tektonike që u ndje në këtë vend, shkaktoi rrëshkitje të terrenit shtufor në këmbët e pallatit gjashtë katësh si dhe tre objekteve të tjera të banimit. Në atë ditë, familjet u evakuan me urdhër nga ish kryebashkiakja Rami për shkak të rrezikut që mbartte zona për t’u strehuar në konvikt. Prej asaj dite e deri më sot, është sonduar vendi dhe asgjë më tepër ndërkohë që banorët presin zgjidhje.