Zjarr i fuqishëm në Mesopotam Agroturizëm, shkrumbohet restoranti i resortit – VIDEO

Zjarr i fuqishëm në Mesopotam Agroturizëm, shkrumbohet restoranti i resortit. Një zjarr i fuqishëm ka përfshirë në orët e para të mëngjesit të kësaj të diele restorantin e Mesopotam Agroturizëm, përgjatë rrugës Sarandë–Syri i Kaltër, duke shkaktuar dëme të mëdha materiale.

Sipas informacioneve paraprake, zjarri është konstatuar rreth orës 05:30 të mëngjesit. Flakët janë përhapur me shpejtësi në ambientet e restorantit, ndërsa struktura është përfshirë thuajse tërësisht nga zjarri.

Nga ngjarja raportohet për dëme të konsiderueshme materiale, ndërsa fatmirësisht, deri në këto momente, nuk raportohet për persona të lënduar.

Shkaqet e zjarrit mbeten ende të paqarta. Pritet që verifikimet në vendngjarje dhe hetimet përkatëse të përcaktojnë origjinën e flakëve dhe rrethanat në të cilat ka nisur zjarri.

Mesopotam Agroturizëm ishte kthyer vitet e fundit në një prej investimeve turistike të njohura në zonën e Mesopotamit. Resorti, i ndërtuar rreth tre vite më parë, ndodhet përgjatë një prej akseve turistike më të frekuentuara të jugut, rrugës që lidh Sarandën me Syrin e Kaltër.

Zjarri i mëngjesit të sotëm ka shkaktuar një goditje të rëndë për biznesin, ndërsa përmasat e plota të dëmeve pritet të evidentohen pas përfundimit të verifikimeve në vendngjarje. Saranda Web