Zbardhet kontrata e HEC Sasaj: Në lumin Kalasë vetëm 12% e ujit, tjetrën e merr Hec

Zbardhet kontrata e HEC Sasaj: Në lumin e Kalasës vetëm 12% e ujit, tjetrën e merr Hec Sasaj

Pas një beteje të gjatë dhe përpjekjesh të vazhdueshme për transparencë, banorët e fshatit Kalasë më në fund kanë arritur të sigurojnë një kopje të kontratës së vitit 2022, që i jep hidrocentralit Sasaj të drejtën për shfrytëzimin e ujit të lumit Kalasa. Kontrata mban datën 21 korrik 2022 dhe lejon shfrytëzimin e një sasie prej 3.2 m³ ujë për sekondë, një rritje e ndjeshme krahasuar me marrëveshjen e mëparshme të vitit 2006.

Kontrata e parë, e nënshkruar më 4 dhjetor 2006, i kishte dhënë HEC Sasaj një kuotë prej 2 m³ ujë për sekondë. Kontrata e vitit 2022 ka rritur ndjeshëm sasinë e ujit të marrë nga lumi me 1.2 m³/s, duke lënë kështu vetëm 0.44 m³/s ose 12% të sasisë së ujit në shtratin e lumit Kalasa.

Kjo situatë është përjetuar si një kërcënim i drejtpërdrejtë për ekosistemin e zonës, bujqësinë dhe jetesën e banorëve, të cilët janë të varur nga ky burim natyror. Banorët e Kalasës, të cilët kanë vuajtur pasojat e pakësimit të prurjeve të lumit, janë të vendosur të kërkojnë anulimin e kësaj kontrate të re. Ata argumentojnë se shfrytëzimi i tepërt i ujit nga HEC Sasaj po ndikon negativisht në cilësinë e jetës së tyre, po dëmton mjedisin dhe po kërcënon të ardhmen e bujqësisë dhe turizmit lokal.

“Kjo kontratë është një goditje për komunitetin tonë. Lumi Kalasa ka qenë gjithmonë burimi ynë kryesor i ujit për bujqësi dhe për nevojat e përditshme, por tani ndjehemi të braktisur. Nuk mund të lejojmë që vetëm 12% e ujit të mbetet në lumë, ndërkohë që nevojat tona nuk po merren parasysh,”  thonë banorët e Kalasës.

Kërkesat e banorëve janë të qarta: ata kërkojnë që kontrata e vitit 2022 të anulohet dhe që të bëhet një rishikim i shfrytëzimit të ujit në përputhje me të drejtat e tyre dhe me mbrojtjen e mjedisit. Situata ka ndezur një debat të ashpër mbi mënyrën se si burimet natyrore menaxhohen dhe përballohen në zonat rurale, ku interesat ekonomike shpesh vihen përballë nevojave të komuniteteve vendase.

Banorët e Kalasës janë të përgatitur të ndërmarrin hapa ligjorë për të mbrojtur të drejtën e tyre mbi burimet natyrore dhe për të garantuar që ekuilibri i lumit Kalasa të rikthehet, për të mirën e mjedisit dhe të komunitetit të tyre.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb