Vrasja e avokatit, solidaritet nga avokatët e Sarandës, bojkot gjyqeve

Në solidaritet me Dhomën e Avokatisë në Elbasan që bojkotoi gjyqet deri ditën e premte në shenjë proteste pas vrasjes se avokatit Ravik Gurra, janë bashkuar edhe  avokatët në Sarandë.

Saranda Web ka mësuar  se avokatët do të bojkotojnë seancat gjyqësore për tre ditë, ditën e mërkurë, të enjte dhe të premte.  Protesta do të nisë ditën e nesërme në orën 08:00.

Ngjarja e rëndë ndodhi pranë një lokali të njohur në qendër të qytetit të Elbasanit rreth orës tetë të darkës të datës 22 mars dhe autori dyshohet se ka qene i maskuar. Viktima, Gurra, që njihet për mbrojtjen e çështjeve të bujshme si ajo e Çapjave dhe Shullazit, ka qenë i ulur në ambientet e lokalit jashtë kur është qëlluar pas koke. Ai ishte i shoqëruar me dy persona të tjerë në tavolinë, njëri prej tyre gjithashtu avokat. Autori që e ka qëlluar me pistoletë është larguar me një mjet që është gjetur i djegur në dalje të qytetit të Elbasanit.

Hetimet për zbardhjen e vrasjes së Ravik Gurrës i kanë kaluar Prokurorisë për Krimet e Rënda në Tiranë, pasi bëhet fjalë për ekzekutim të funksionarëve publikë. Grupi hetimor që po punon për zbardhjen e vrasjes mafioze, ende nuk ka një të dyshuar konkret, ndërkohë që për t’u marrë në pyetje janë shoqëruar shumë persona. Ngjarja ndodhi në qendër të qytetit, ku ndodhen dhe shumë institucione publike. Gjithçka ka qenë shumë e shpejtë sa dhe miqtë e tij dhe dëshmitarë në ambientet e jashtme të lokalit kanë menduar se avokatit i kanë rënë të fiktë kur e panë të shtrirë në tokë.  Ka dyshime të forta se autori është paguar, ndërsa konsiderohet vrasje për shkak të detyrës.