Pas vdekjes së foshnjës në Sarandë ka reaguar Avokati i Popullit Igli Totozani. Në njoftimin zyrtar thuhet se sipas raportimit te mediave dhe bluzave të bardha në spitalin e Sarandës foshnja ka humbur jetën si pasojë e të ftohtit.
Më tej në njoftim theksohet se Avokati i Popullit, Igli Totozani i bën përsëri apel këtë herë shurdhërisë dhe indiferencës së pushtetit vendor dhe atij qendror, që i kanë lënë këto shtresa në nevojë në pikë të hallit, aq sa nuk munden t’i mbijetojnë të ftohtit.
“Totozani, i shpreh ngushëllimet familjes Spahiu për humbjen e rëndë, në këto kushte të tmerrshme. Avokati i Popullit kërkon me forcë marrjen e masave urgjente për të pastrehët, të varfrit dhe të pamundurit, që të mos humbasin më jetë të pafajshme”, thuhet në komunikatën zyrtare.
