Vazhdon kriza në Qafë Botë, Vasil Llajo: Jam në komunikim të përditshëm, dogana greke do shtojë staf

Vazhdon kriza në Qafë Botë – Vasil Llajo: Jam në komunikim të përditshëm, janë hapur 10 vende të reja pune në doganën greke

 Pavarësisht ndërhyrjeve të mëhershme dhe zotimeve të autoriteteve shqiptare e greke, pika kufitare në Qafë Botë – Mavromati vijon të përballet me radhë të gjata dhe vështirësi serioze në qarkullim, veçanërisht gjatë orëve të pikut.

Në një reagim për Saranda Web, deputeti i Qarkut të Vlorës, Vasil Llajo, ka bërë të ditur se është në komunikim të përditshëm me punonjësit e doganës, me deputetin grek të Thesprotisë Vasilis Giogiakas, si dhe me përfaqësues vendorë në Igumenicë.

“Qytetarët më kanë informuar për situatën problematike në doganën e Qafë Botës, e cila vazhdon të mbetet shqetësuese. Sot kam komunikuar sërish me z. Giogiakas, i cili më informoi se Ministria Greke e Ekonomisë, në bashkëpunim me Drejtorinë e Përgjithshme të Doganave të Greqisë, ka shpallur 10 vende të lira pune për doganën e Mavromatit, të cilat pritet të plotësohen me një procedurë të përshpejtuar,” – tha Llajo.

Ai shtoi se janë marrë nisma konkrete për të rritur funksionalitetin e doganës, ndërsa u informua nga pala greke se edhe Ministri Shqiptar për Evropën dhe Punët e Jashtme, z. Igli Hasani, ka ndërhyrë për të lehtësuar situatën.

Ky reagim vjen vetëm pak ditë pas lajmit për normalizimin e përkohshëm të qarkullimit, falë ndërhyrjes së përbashkët të deputetit Llajo dhe atij grek Giogiakas, si dhe pas nismës zyrtare të ndërmarrë nga Llajo dhe kryebashkiakët e Sarandës, Finiqit, Konispolit dhe Delvinës, të cilët kërkuan regjim 24-orësh për këtë pikë kufitare.

Megjithatë, realiteti në terren tregon se problematikat vijojnë, duke rritur presionin për masa konkrete dhe të qëndrueshme. Deputeti Vasil Llajo ka theksuar se çështja e Qafë Botës është një prioritet personal dhe se nuk do të ndalet derisa të garantohet një funksionim normal i kësaj pike jetike për qytetarët e jugut dhe minoritetin grek që lëviz çdo ditë në të dy anët e kufirit.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb