Sot, 29 janar 2026, mblidhet Këshilli Bashkiak Sarandë – VIDEO

Sot, 29 janar 2026, mblidhet Këshilli Bashkiak Sarandë – Ja rendi i ditës

Sot, më 29.01.2026, në orën 13:00, në sallën e mbledhjeve të Këshillit Bashkiak Sarandë, zhvillohet mbledhja e radhës e Këshillit të Bashkisë.

Në këtë mbledhje, këshilltarët bashkiakë do të shqyrtojnë dhe diskutojnë disa projektvendime të rëndësishme me ndikim social, ekonomik dhe arsimor për komunitetin.

NDIQENI DREJTPËRDREJT

Rendi i ditës përfshin projektvendime që lidhen me përdorimin e fondit të kushtëzuar për ndihmën ekonomike deri në 6% për muajin Dhjetor 2025, si dhe dhënien e ndihmës ekonomike nga të ardhurat e Bashkisë për të njëjtin muaj. Po ashtu, do të shqyrtohet miratimi i kritereve për dhënien e ndihmës ekonomike nga fondi i kushtëzuar dhe nga buxheti vendor për vitin 2026.

Në rendin e ditës është edhe miratimi i listës së përfituesve nga programi i subvencionimit të qirasë në tregun e lirë, si dhe miratimi i listës emërore të nxënësve të arsimit parauniversitar në institucionet arsimore publike që do të përfitojnë bursa financiare për vitin shkollor 2025–2026.

Gjithashtu, pritet të shqyrtohet përdorimi dhe plani i shpërndarjes së fondit të grantit të bazuar në performancë për bashkitë për vitin 2025, si dhe një ndryshim në fushën e përdorimit të pasurive nr. 15/609 dhe 15/610, në zonën kadastrale 8642, në pronësi të Bashkisë Sarandë. Ky ndryshim synon shtimin e fushës së përdorimit për zhvillimin e programeve të arsimit parauniversitar dhe për realizimin e projektit “Poli i Zhvillimit Turistik Sarandë”.

Në fund të mbledhjes, do të prezantohet edhe raporti mbi veprimtarinë e Këshillit të Bashkisë për vitin 2025.

Mbledhja pritet të sjellë vendimmarrje me rëndësi për politikat sociale, arsimin, zhvillimin urban dhe planifikimin strategjik të qytetit të Sarandës.