Sorollateshin prej kohësh, pas ankesës në Saranda Web qytetarët gjejnë zgjidhje për problemin
Pas muajsh pritje dhe ankesa të vazhdueshme, banorët e një blloku banesash private në rrugën “Gjergj Arianiti”, pranë ish-Regjimentit, më në fund kanë gjetur zgjidhje për problemin e kanalizimeve. Falë denoncimit të tyre në Saranda Web dhe përkushtimit të punonjësve të Ndërmarjes së Ujësjellës-Kanalizimeve Sarandë (UK Sarandë), të drejtuar nga përgjegjësi Alban Alikaj, u bë e mundur zhbllokimi i pusetave dhe shtrimi i tubacioneve të reja, duke i dhënë fund kësaj situate shqetësuese.
Problemi filloi të raportohej nga banorët që prej datës 25 korrik, kur pusetat e ujërave të ndotura jashtë banesave të tyre u bllokuan. Shkaku ishte lidhur me defektet e tubacioneve që vinin nga një pallat përpara. Situata e krijuar solli derdhjen e ujërave të ndotura në rrugë, duke krijuar një mjedis të ndotur dhe të rrezikshëm për shëndetin e banorëve.
Për katër muaj me radhë, banorët raportuan problemin te administrata e UK Sarandë, duke zhvilluar takime me drejtuesit dhe inxhinierët teknikë. Megjithatë, por asnjë veprim konkret nuk ishte marrë.
Ankesa në Saranda Web solli rezultat
Publikimi i ankesës nga Saranda Web i dha kësaj problematike një jehonë të gjerë, duke rritur presionin ndaj institucionit përkatës. Falë kësaj nisme dhe reagimit të shpejtë të drejtuesit Alban Alikaj, UK Sarandë mobilizoi ekipet e saj për të zgjidhur situatën. U bë hapja e kanalizimeve dhe shtrimi i tubacioneve të reja, duke garantuar një zgjidhje të qëndrueshme.
Banorët shprehin mirënjohjen e tyre ndaj ekipit të UK Sarandë dhe përgjegjësit Alikaj për reagimin dhe profesionalizmin e treguar.
Ky rast tregon fuqinë e komunitetit dhe medias Saranda Web në adresimin e problematikave të qytetarëve. Njëkohësisht, ai duhet të shërbejë si një shembull për institucionet publike për të reaguar me shpejtësi ndaj shqetësimeve të ngjashme dhe për të përmbushur detyrimet e tyre ndaj komunitetit.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
