Nga Agron MEMA
Skandal i mitropolitit të Gjirokastrës, i cili, nga mesha në kishën e Shën – Harallambit të qytetit të Sarandës, u bëri thirrje publike të krishterëve, që të bojkotojnë shërbimet funerale nga zyrat, të cilat kanë pronarë …myslimanë. Dje ishte dita e luleve.
Qindra besimtarë ortodoksë u mblodhën për të dëgjuar meshën në kishën e Shën- Harallambit në qytetin e Sarandës, e cila u mbajt nga mitropoliti i Gjirokastrës Dhimitër Dikboshan, një shërbestar gati 30-vjeçar në këtë kishë. Mesha u mbajt në gjuhën greke.
Por ajo që shqetësoi besimtarët dhe u bë shkak për këtë shkrim me denoncimet e tyre pranë gazetës, është fakti se pas meshës mitropoliti i Gjirokastrës Dhimitër Dikboshan u bëri thirrje besimtarëve që për ceremonitë mortore të mos paraqiten në zyrat funerale të pronarëve myslimanë.
Kjo ka tingëlluar keq në veshin e besimtarëve, të cilët kanë vite në bashkëjetesë paqësore mes banorëve me besime fetare të ndryshme.
Thirrje të tilla të mitropolitit të Gjirokastrës, i cili u kërkon besimtarëve të krishterë që të bojkotojnë shërbimet e myslimanëve janë përçarëse, të rrezikshme, që cenojnë harmoninë midis besimeve fetare, që nxitin urrejtjen, hakmarrjen, përplasjet civile me motive fetare.
Lind pyetja: Nga kush merr udhëzime të tilla mitropoliti i Gjirokastrës, sepse pakkush mund të besojë, se thirrje të tilla janë iniciativë personale e mitropolitit? Kujt i intereson që të përçahen njerëzit mbi motive fetare dhe të ndizen vatra të urrejtjes dhe të hakmarrjes, deri në përplasje civile të njerëzve me besime të kundërta fetare? Pak ditë më parë në Zelandën e Re ndodhi një masakër, pikërisht e nxitur nga motive fetare.
Mos vallë, mitropoliti i Gjirokastrës u frymëzua nga ajo masakër e nxitur nga motivet fetare? Kush i lejon këta emisarë të fjalës së Zotit të dalin nga udha e Zotit?
Me ç’të drejtë mitropoliti i Gjirokastrës fyen komunitetet me besime të ndryshme? Ky mitropolit, ka cenuar edhe Kushtetutën e Republikës së Shqipërisë, si nxitës i urrejtjes fetare të popullit, dhe ligji duhet ta çojë në bankën e të akuzuarve këta përçarës të popullit?
Shteti duhet të ndërhyjë dhe t’u tregojë vendin pehlivanëve shovinistë dhe t’i ndal frymën përçarëse antikombëtare të tyre. Agron Mema / Gazeta Telegraf
