Panajot Boli promovon në Sarandë librin “Më shkruan vjeshta”
Në Sarandë u promovua sot libri me poezi “Më shkruan vjeshta” i poetit dhe shkrimtarit Panajot Boli, në një aktivitet të organizuar nga Klubi i Krijuesve Jonianë.
“Më shkruan vjeshta” është libri i 13-të i autorit dhe vëllimi i nëntë poetik, duke pasuruar më tej krijimtarinë e tij letrare.
Në këtë vëllim, vjeshta nuk shfaqet vetëm si stinë, por si metaforë e pjekurisë, kujtesës dhe kalimit të kohës. Natyra, vendlindja, dashuria dhe malli ndërthuren në poezitë e Bolit, ku mali, lumi, shiu, era apo pemët marrin jetë dhe bëhen pjesë e botës së brendshme të poetit.
Një vend të veçantë zë vendlindja, e cila rikthehet përmes kujtimeve, rrugicave, oborrit, pemëve dhe njerëzve të dashur. Edhe koha është një motiv i fortë, jo vetëm si diçka që ikën, por si gjurmë që mbetet te njeriu dhe shndërrohet në poezi.
Krijimtaria e Panajot Bolit mbetet e lidhur me traditën dhe romantizmin, por autori sjell një gjuhë të afërt, metafora dhe personifikime që i japin natyrës dhe kujtesës një dimension të gjallë.
Libri është botuar nga Shtëpia Botuese NERAIDA, me drejtues Jani Malo.
Promovimi në Sarandë solli në vëmendje një tjetër vepër të Panajot Bolit, ku vjeshta bëhet më shumë se një stinë: një bashkëbiseduese me poetin për jetën, kujtesën, dashurinë dhe kohën. Saranda Web
