Menjëherë pas përfundimit të takimit në Sarandë që çeli turin e takimeve që Kokëdhima do të zhvillojë në gjithë Jugun, Kokëdhima ka denoncuar ashpër përpjekjet për të mos lejuar socialistët të takohen me Kokëdhimën.“Këto lloj shantazhesh nuk janë pozitive. Ato ushqehen nga mendësi totalitare, antidemokratike, ushqehen nga mendësi berishiane, dhe këto nuk duhet të jenë”, – u shpreh ish-deputeti i Sarandës pas përfundimit të takimit të sotëm. Kujtojmë se takimi i sotëm ishte ideuar si shfaqje ku njerëzit që dilnin në foltore apo flisnin me mikrofon nga salla, tregonin historitë e tyre për mirësitë që u kishte bërë Kokëdhima gjatë epokës kur ishte deputet dhe njeri i gjithëpushtetshëm në Sarandë.
Funksionarët dhe drejtuesit e disa drejtorive në Bashkinë Sarandë dhe institucione të tjera nuk ishin personalisht në takim, por ata kishin dërguar si të deleguar familjarë dhe miq të tyre për të mbushur sallën. Nga ana tjetër, militantë të vjetër të Partisë Socialiste e shikojnë largimin e Kokëdhimës si largimin e të keqes prej Sarandës, pasi sipas tyre, Kokëdhima impononte gjithçka në vendimmarrje, pa pyetur për strukturat dhe emëronte në poste dhe vendoste në punë njerëz që nuk kishin asgjë të përbashkët me PS-në, por që mund të ishin për Kokëdhimën “ushtarë të bindur”.
