Kokainë nga Hollanda, arrestohen 3 shqiptarë në Athinë

Katër anëtarë të një organizate kriminale, mes tyre 3 shqiptarë dhe një shtetas grek u arrestuan dhe u sekuestrua një sasi prej gati 9 kg kokainë, vlera e së cilës në treg do të ishte 400 mijë euro. Sipas policisë organizata merrej me transportin e ngarkesave të mëdha të lëndëve narkotike nga Europa Perëndimore, kryesisht Hollanda drejt Greqisë. Operacioni i policisë u ndërmor më 23 dhjetor në portin e Patras. Droga, 8 kg e 975 gr kokainë është gjetur në kabinën e një kamioni të drejtuar nga një shqiptar 45 vjeçar. Mësohet se shqiptari kishte siguruar kokainën pak ditë para arrestimit në një zonë pranë kufirit Belgjikë- Hollandë me ndihmën e një shqiptari tjetër 24 vjeçar, i cili ndodhej atje për të koordinuar transportimin e kokainës. Tre arrestimet e tjera janë kryer në disa zona të Athinës. Të arrestuarit janë të moshës 24, 28 dhe 39 vjeç. Policia greke thotë së në cilësinë e provës material veç kokainës u sekuestruan dhe 2 pistoleta,95 fishekë,30.000 euro kash, një kamion frigoriferik, 3 autovetura,11 celularë dhe 1 tablet.