Titulli “Hasan Tahsini” do të jepet çdo vit nga Bashkia Sarandë – Njoftimi i bërë gjatë ceremonisë së 34-vjetorit të Shoqatës “Çamëria”
Gjatë ceremonisë përkujtimore të 34-vjetorit të themelimit të Shoqatës Patriotike Atdhetare “Çamëria” në Sarandë, është bërë një njoftim i rëndësishëm për nxitjen e vlerave kulturore dhe atdhetare në këtë trevë.
Kryetari i grupit të këshilltarëve të Partisë Socialiste në Bashkinë Sarandë, z. Gjergji Imeri, deklaroi se shumë shpejt do të propozohet në Këshillin Bashkiak vendimi që Bashkia Sarandë, çdo vit, të japë titullin akademik “Hasan Tahsini”. Ky titull do të shoqërohet edhe me shpërblim financiar për krijuesit dhe intelektualët, si një nxitje konkrete për promovimin e vlerave kulturore dhe atdhetare të zonës.
Iniciativa synon të nderojë figurën madhore të Hasan Tahsinit, dijetarin e shquar me origjinë nga Çamëria, dhe njëkohësisht të mbështesë talentet lokale që kontribuojnë për ruajtjen dhe zhvillimin e trashëgimisë sonë kombëtare.
Ky propozim u mirëprit me duartrokitje nga të pranishmit dhe u cilësua si një hap domethënës në drejtim të nderimit të figurave të mëdha dhe përkrahjes së brezave të rinj krijues në trevën e Sarandës.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
