Erdhën për punë në Shqipëri, kapen duke u arratisur 7 emigrantë nga Etiopia – arrestohet organizatori Finan Kibrom
Policia Kufitare në pikën e Qafë Botës, në bashkëpunim me patrullat e FRONTEX, ka goditur një tjetër rast të trafikut të paligjshëm të emigrantëve në kufirin shqiptaro-grek.
Sipas burimeve zyrtare, mbrëmjen e djeshme në zonën e Kataetos u kapën 7 shtetas nga Etiopia, të cilët kishin hyrë në mënyrë të rregullt në Shqipëri me qëllim punësimi, por më pas tentuan të kalonin ilegalisht kufirin drejt Greqisë.
Ata u kapën në shoqërinë e një shtetasi të huaj, që kishte marrë përsipër organizimin dhe shoqërimin e tyre kundrejt pagesës.
Në pranga ka rënë Finan Kibrom, 31 vjeç, banues në Mbretërinë e Bashkuar, i cili po i udhëhiqte klandestinët drejt kufirit grek, nëpërmjet zonave të pyllëzuara të vijës së gjelbër.
Nga hetimet paraprake rezulton se shtetasit etiopianë ishin pajisur me dokumentacion pune në Shqipëri, por qëllimi i tyre përfundimtar ishte kalimi i paligjshëm drejt vendeve të BE-së.
Finan Kibrom akuzohet për veprën penale “Dhënia e ndihmës për kalim të paligjshëm të kufijve shtetërorë” dhe materialet në ngarkim të tij i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
Policia kufitare thekson se kontrollet intensive do të vijojnë në të gjithë segmentin kufitar, për të parandaluar dhe goditur çdo tentativë të trafikimit të qenieve njerëzore.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
