Dashamir Malo: Saranda, përveç destinacion turistik, po shdërrohet edhe destinacion poetik VIDEO
Dashamir Malo në intervistë për Saranda Web: Publikohet antologjia poetike “Takohemi në Jug” (Let’s Meet in the South) – Edicioni II
Në një intervistë për Saranda Web, poeti Dashamir Malo prezantoi daljen e antologjisë poetike “Takohemi në Jug”, edicioni i dytë, e cila publikohet në kuadër të Festivalit Poetik Ndërkombëtar me të njëjtin emër, që organizohet në Sarandë. Antologjia, botim i shtëpisë botuese “Neraida” në Tiranë, përmbledh krijimet e 36 poetëve nga 13 vende të ndryshme, duke përfshirë Shqipërinë, Kosovën, Maqedoninë e Veriut, Italinë, Greqinë, SHBA-në, Zvicrën, Rumaninë, Turqinë, Slloveninë, Tunizinë, Bullgarinë dhe Kanadanë.
Dashamir Malo, përgatitësi i kësaj antologjie dhe drejtuesi i Klubit të Poetëve të Jugut me qendër në Sarandë, thekson rëndësinë e këtij botimi, i cili sjell zërat poetikë ndërkombëtarë për lexuesin shqiptar. Poetët janë renditur alfabetikisht dhe prezantohen me nga të paktën tre poezi, duke bërë që botimi të jetë një thesar për dashamirësit e poezisë bashkëkohore. Një veçanti e antologjisë është përkthimi në shqip i poezive të poetëve të huaj, punë e realizuar nga përkthyesit e talentuar Merita Paparisto, Griselda Doka, Vangjel Zafirati, Nurie Emrullai, Teodor Lisimaku dhe vetë Dashamir Malo.
Në intervistë, Malo shpreh krenarinë që Saranda nuk është vetëm një destinacion turistik, por po bëhet edhe një qendër e rëndësishme për kulturën poetike, duke tërhequr çdo vit poetë nga vende të ndryshme. Ai shton se në vitin e ardhshëm planifikohet jo vetëm një edicion i dytë i festivalit, por edhe një Festival i Pranverës, që do të mirëpresë poetë të rinj, duke pasuruar kështu jetën kulturore të qytetit.
Antologjia poetike “Takohemi në Jug” reflekton angazhimin për promovimin e poezisë dhe përfshin Sarandën në hartën e festivaleve poetike ndërkombëtare.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
