Aksidenti në Fterrë – Humb jetën punonjësi i Policisë, 2 të tjerë në gjendje të rëndë

Aksidenti në Fterrë – Humb jetën punonjësi i Policisë, dy të tjerë në gjendje të rëndë

Një ngjarje e rëndë dhe thellësisht tronditëse ka ndodhur sot, rreth orës 12:00, në aksin rrugor Borsh–Fterrë, ku një automjet tip “Toyota” ka dalë nga rruga dhe ka përfunduar në një kanal anësor, duke shkaktuar humbjen e një jete dhe duke lënë dy persona të tjerë të plagosur rëndë.

Sipas të dhënave paraprake, dyshohet se drejtuesi i automjetit ka humbur kontrollin mbi drejtimin e mjetit në një prej kthesave të rrugës së ngushtë dhe të rrezikshme. Brenda mjetit udhëtonin tre shtetas: Romeo Xuxi, Vangjel Thimio dhe Eduart Maçi 56 vjeç, punonjës i Policisë së Shtetit. Fatkeqësisht, ky i fundit ka ndërruar jetë në vendngjarje, si pasojë e plagëve të rënda të marra.

Eduart Maçi, një shërbestar i ligjit, i njohur nga kolegët si njeri i përkushtuar dhe i drejtë, u nda sot nga jeta në një mënyrë tragjike, duke lënë pas pikëllim të thellë në radhët e familjarëve, miqve dhe kolegëve të tij. Jeta e tij u pre në mes, në një rrugë të cilës shumë herë i kishte kaluar me detyrën në zemër, por që sot iu kthye në rrugë pa kthim.

Dy shtetasit e tjerë janë transportuar me urgjencë në spital, në gjendje të rëndë shëndetësore, ndërsa mjekët po luftojnë për jetën e tyre.

Kjo ngjarje e hidhur i rikujton të gjithëve pasiguritë e aksit rrugor Borsh–Fterrë dhe nevojën urgjente për ndërhyrje në infrastrukturë dhe rritjen e kujdesit gjatë drejtimit të automjeteve.

Sot Saranda, Fterra dhe gjithë komuniteti policor janë më të varfër për një bir, mik e koleg të ndershëm, që iku para kohe. Prehu në paqe, Eduart.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb