A do të ketë një ultimatum nga Rama për lirimin e trotuarëve në Sarandë?
Pas ultimatumit të Ramës, qytetarët e Sarandës shpërthejnë në ankesa: Trotuaret janë pushtuar, ku është shteti?
Pas paralajmërimeve të forta të kryeministrit Edi Rama deri nesër në mëngjes për lirimin e hapësirave publike dhe trotuareve, qytetarët kanë vërshuar me lumë ankesash në Saranda Web, ku kërkojnë të njëjtin vëmendje dhe ndërhyrje urgjente edhe në qytetin e tyre.
Në Sarandë situata është bërë e papërballueshme: pjesa më e madhe e trotuareve (në ato zona ku ende ekzistojnë), janë zënë nga tavolina lokalesh, karrige, motorra, makina të parkuara apo automjete me qira. Në shumë lagje, kalimi i këmbësorëve është i pamundur, veçanërisht për të moshuarit, nënat me karroca apo personat me aftësi të kufizuara.
Ndërkohë, në Vlorë ka nisur një aksion i gjerë për lirimin e hapësirave publike, i ndjekur nga afër nga kryetari i bashkisë Ermal Dredha dhe ministri Blendi Gonxhja. “Duhet ta shohim qytetin me syrin e turistit,” – tha Dredha, duke paralajmëruar se aty ku do të haset rezistencë, do të ndërhyjë forca e ligjit. Ky operacion pastron qytetin në pritje të një tjetër vizite të kryeministrit Rama të hënën, i cili do të inspektojë personalisht nëse porositë e tij janë zbatuar.
Po në Sarandë, çfarë do të ndodhë?
A do të ndërmarrë Bashkia ndonjë hap konkret për lirimin e hapësirave publike? Apo edhe këtu pritet një ultimatum nga Rama për t’u vendosur rregulli?
Qytetarët kërkojnë që edhe Saranda – një nga qytetet më turistike të vendit – të mos mbetet peng i abuzimit me hapësirat publike dhe të nisë menjëherë një plan konkret për pastrimin e qytetit, lirimin e trotuareve dhe kthimin e dinjitetit urban.
Saranda meriton më shumë! Dhe zëri i qytetarëve nuk mund të injorohet më.
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
