Thriller me fund të lumtur në Lukovë: 2 pushues të huaj shpëtohen pas stuhisë së fortë

Thriller me fund të lumtur në Lukovë: 2 pushues të huaj shpëtohen pas stuhisë së fortë. Pushuesit e ITAKA Hotel shpëtohen pas 4 orësh nga humnera.

Një ngjarje e jashtëzakonshme dhe dramatike ka ndodhur këtë pasdite në Lukovë, Bashkia Himarë, ku dy pushues të huaj, të akomoduar në ITAKA Hotel Lukovë, përjetuan momente frike dhe rreziku për jetën pas një stuhie të fuqishme.

Çifti kishte dalë të eksploronte bukuritë e fshatit dhe po filmonte me kamerë panoramat e zonës, kur rreth orës 15:00 moti ndryshoi papritur. Një stuhi e fortë me reshje të dendura shiu i detyroi të kërkonin strehim pranë ujëvarës së “Përrroit të Madh”.

Por vetëm 10 minuta më vonë, rrjedha e ujit u kthye në rrezik serioz. Uji i rrëmbyer i përfshiu dhe i tërhoqi mes ferrave e shkurreve, duke i zhvendosur rreth një kilometër më poshtë. Gjatë këtij itinerari të rrezikshëm, ata përplaseshin majtas e djathtas nga fuqia e ujit, ndërsa temperatura e ulët e tij e duke e përkeqësuar gjendjen.

Pas përleshjes me rrjedhën, ata u ndalën në një humnerë të thellë rreth 15 metra lartësi, pa asnjë mundësi për t’u larguar. Çanta e tyre, e padepërtueshme nga uji, rezultoi shpëtim: brenda saj ndodheshin telefoni dhe çelësi i dhomës së hotelit, ku ishte shënuar numri i kontaktit.

Në orën 15:49 ata arritën të telefononin recepsionin e ITAKA Hotel, duke kërkuar ndihmë. Fillimisht nuk dinin si të tregonin vendndodhjen e saktë dhe përpjekjet për ta përshkruar zonën nuk dhanë rezultat. Vetëm pasi u udhëzuan se si të dërgonin koordinatat nga telefoni, arritën të shpërndanin lokacionin e tyre.

Pas marrjes së informacionit, nisi një operacion i vështirë shpëtimi, ku u angazhuan administratori i ITAKA Hotel Lukovë, përfaqësues të njësisë administrative dhe banorë të zonës. Pavarësisht shiut të pandërprerë dhe erës së fortë, ata u nisën drejt vendit ku ishin bllokuar pushuesit.

Përpjekjet zgjatën mbi katër orë. Me litarë, mes terrenit të vështirë dhe kushteve ekstreme atmosferike, grupi i shpëtimit arriti t’i tërhiqte nga humnera dhe t’i nxirrte në një rrugë automobilistike. Më pas, ata u transportuan të sigurt drejt hotelit të tyre.

Sot, pas orëve të frikës dhe përpjekjes për mbijetesë, pushuesit ndodhen në dhomën e tyre në ITAKA Hotel, ku pas një banje të ngrohtë janë rikthyer në normalitet. Ata shprehën mirënjohje të thellë për reagimin e shpejtë dhe për ndihmën e stafit të hotelit, përfaqësuesve të zonës dhe banorëve që kontribuan në këtë shpëtim të vështirë.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb