Një ngjarje tepër e rëndë ka ndodhur mes një çifti shqiptarësh në Greqi. Siç raportohet nga mediat e shtetit fqinj, një 45 vjeçar shqiptar ka tentuar të vrasë bashkëshorten e tij, duke i vënë asaj zjarrin.
Paraprakisht mësohet se mes çiftit kishte nisur fillimisht një konflikt verbal, pasi burri dyshonte për xhelozi. Më pas, siç raportohet në media, ai spërkati gruan e tij me benzinë dhe i vuri flakën.
Kanë qenë fqinjët ata të cilët dëgjuan britmat e gruas së tmerruar dhe më pas njoftuan policinë dhe zjarrfikësen. Ata panë se nga apartamenti i katit të 5-të të familjes shqiptare po dilte tym.
Ekipet e emergjencës që mbërritën menjëherë në vendngjarje, mundën të shuanin zjarrin në banesë. Gruaja shpëtoi, por ka pësuar djegie të rënda.
Edhe 45-vjeçari pësoi lëndime të lehta në momentin që i vuri flakën gruas, por nuk ka rrezik për jetën. Ai është arrestuar nga policia dhe akuzohet për vrasje të mbetur në tentativë.
Në momentin e ngjarjes, dy fëmijët 16 dhe 18 vjeç të çiftit shqiptar, nuk ndodheshin në banesë. Shtypi grek nuk ka publikuar identitetin e burrit dhe gruas, por bëhet me dije se ata jetonin dhe punonin prej vitesh në Greqi. JOQ Albania
