Ish-deputeti kërkon ta përvetësojë, banorët e duan kënd lojrash. Vendimi jepet nga Gjykata e Sarandës

Ish-deputeti kërkon ta përvetësojë, banorët e duan kënd lojrash – vendimi merret më 24 korrik në Gjykatën e Sarandës

Një sipërfaqe publike me nr. pasurie 22/130 në një nga lagjet e qytetit të Sarandës ndodhet në qendër të një përballjeje ligjore dhe qytetare, vendimi për të cilën pritet të merret më 24 korrik nga Gjykata e Sarandës.

Ish-deputeti Artur Roshi ka hapur proces gjyqësor për ta përvetësuar këtë tokë përmes procedurës së parashkrimit fitues. Në një VIDEO ish-deputeti tregon si e ka prodhuar këtë tokë nga mbushja e detit me inerte, një veprim për të cilin ai pohon se ka kontribuar vetë.  Kjo mënyrë pretendimi ka ngjallur reagime të forta në opinionin publik, për shkak se trualli në fjalë aktualisht figuron si pronë publike.

Në anën tjetër, banorët e zonës janë angazhuar në mënyrë të organizuar, duke dorëzuar një peticion pranë Bashkisë Sarandë ku kërkojnë që kjo hapësirë të mos kthehet në pronë private, por të shërbejë si lulishte dhe kënd lojërash për fëmijët e lagjes. Në mbështetje të kësaj kërkese, Bashkia ka paraqitur në seancat gjyqësore një projekt konkret për kthimin e parcelës në një hapësirë të gjelbër dhe funksionale për komunitetin.

Çështja ka marrë vëmendje të gjerë, pasi nuk konsiderohet thjesht një konflikt pronësie, por një përballje mes interesit publik dhe përpjekjeve për përvetësim të hapësirave që u përkasin qytetarëve. Vendimi i Gjykatës më 24 korrik pritet me interes, pasi do të përcaktojë nëse kjo sipërfaqe do të ruajë statusin publik dhe do të vihet në shërbim të qytetarëve, apo do të kalojë në pronësi private në bazë të pretendimeve individuale.

Komuniteti shpreson që drejtësia të mbrojë të mirën e përbashkët dhe të garantojë që hapësirat publike të mos cenohen, por të mbeten të aksesueshme dhe të dobishme për të gjithë.

Website Saranda Web

Facebook Saranda Web

Instagram saranda.web

Youtube sarandaweb

Tiktok saranda.web

Pinterest sarandaweb

in sarandaweb